विद्युत् महसुलमा भ्याट हटाउने सरकारको तयारी
सोमबार, ०५ असोज २०८३
काठमाडौं ।
सरकारले विद्युत् महसुलमा चालु आर्थिक वर्षदेखि लगाउँदै आएको मूल्य अभिवृद्धि कर (भ्याट) हटाउने तयारी गरेको छ।
ऊर्जा, जलस्रोत तथा सिँचाइमन्त्री विराजभक्त श्रेष्ठ र अर्थमन्त्री डा. स्वर्णिम वाग्लेबीच भएको छलफलमा विद्युत्मा लगाइएको भ्याट हटाउने विषयमा सैद्धान्तिक सहमति भएको ऊर्जा मन्त्रालय स्रोतले जनाएको छ।
सरकारले चालु आर्थिक वर्ष २०८३/८४ को बजेटमार्फत विद्युत् सेवामा भ्याटको व्यवस्था गरेको थियो। उक्त व्यवस्थाअनुसार मासिक ५० युनिटभन्दा बढी विद्युत् खपत गर्ने घरायसी ग्राहकलाई ५ प्रतिशत तथा औद्योगिक र अन्य गैरघरायसी ग्राहकलाई १३ प्रतिशत भ्याट लाग्दै आएको छ।
ऊर्जा मन्त्रालयका अनुसार अब भ्याट हटाउने प्रस्ताव अर्थमन्त्रीले आगामी मन्त्रिपरिषद् बैठकमा पेस गर्ने तयारी छ।
